من وين أبدأ ؟
كيف أبدأ الشغل عبر الإنترنت ؟
احكولي كيف أبلش أرجوكم ؟
نفسي أطلع فلوس أونلاين بس مش زابط معي !
صارلي بجروبكم أسبوع وحاس حالي مش فاهم إشي !
هاد النوع من الأسئلة والكومنتات بيجينا كل يوم ، ولهيك عملنا (دليل الأعضاء الجدد) هاد وبنقدمه لجميع المهتمين ، عشان يستفيدوا بالذات اللي بيجوا متأخرين ، ويفهموا شو بنحكي ويبلشوا معنا صح smile emoticon
كيف تبدأ شغلك كعامل حر (فريلانسر) أو كصاحب عمل ، عبر الإنترنت ؟!
أولاً خلينا نتفق إنه لازمك تتأكد من وجود ما يؤهلك للعمل الحر عبر الإنترنت ، قبل كل شيء وأي شيء smile emoticon
يعني ، بيلزمك لتبلش الأشياء التالية :
* بلزمك وبقوّة يكون عندك مهارة معينة .. مهارة بتتقنها ، بتحبها ، بتميل إلها ، بتستمتع بالعمل فيها ، أو بتتعلم مهارة جديدة تحبها وتشتغل فيها أونلاين ..
* يجب ولازم وضروري جداً يكون عندك مهارة اسمها (مهارة البحث في جوجل) .. يعني علاقتك بجوجل لازم تكون فوق العادي .. ما رح توصلك (كل) المعلومات لعندك جاهزة .. لازمك تبحبش وتدوّر منيح إنت كمان .. المعلومة اللي بتقرأها هون أو بتسمعها بمحاضراتنا لازم تنبش عليها جوجل كله ..
* يجب تفهم إنه العمل الحر عبر الإنترنت فيه مسؤولية كبيرة عليك، الموضوع مش لعبة، ولا تسلاية، ولا (يالله بجرب وإذا زبطت معي منيح وإذا ما زبطت عادي ما خسرت إشي) .. لأ خسرت يا عزيزي smile emoticon لا تضيع وقتك ، وابذل جهدك منيح .. هالمجال فيه فلوس فقط للناس اللي بوخذوا الموضوع بجدية كاملة .. نعم.. بجدية كاملة .. كــامـــلـــة smile emoticon عامله كوظيفة رسمية حقيقية إلك مع التزام وتعب وجهد واستثمار وتفكير وطموح ورح يعاملك بطريقة منيحة تدهشك بإذن الله smile emoticon
* لابتوب عشان تشتغل منه .. لازم لابتوب ، ولازم لابتوب منيح ، يعني لا تقول موبايل ولا تاب smile emoticon يمكن نقطة غريبة ولكن فعلاً في ناس بسألونا (بصير الشغل من موبايل) .. لأ حبيبي بصيرش smile emoticon آه صح لازم إنترنت سريع كمان ..
* مهم جداً : لازم يكون عندك حساب في البنك الإلكتروني العالمي (باي بال) ..
من هنا :
www.Paypal.com
هاد الحساب عشان تشتري من المواقع ، وعشان تتحول فلوسك عليه .. وطبعاً لازم يكون مفعّل، وما بيتفّعل إلا ببطاقة فيزا كارد أو ماستر كارد .. الموضوع مش صعب ، بخمس دقايق من البنك الأردني الكويتي أو بنك الإسكان (وبدون الحاجة لعمل حساب بنكي ودفع مبلغ مالي) بتطلع فيزا وأمورها ممتازة .. أو اعمل حساب ببنك القاهرة عمان (وكيل بايبال في الأردن) وريّح راسك smile emoticon هاي البطاقة هي أحسن حل لتستلم أرباحك عن طريقها ..
للتعرف على طريقة عمل حساب في (بايبال) وطريقة تفعيله وربطه ببطاقة الفيزا المدفوعة مسبقاً ، يرجى قراءة هذا الموضوع :
( غداً سأضع الرابط هنا )
لهون واضحة الأمور معك إن شاء الله ؟ صح ؟ طيب .. هلأ بدي منك تفكر منيح بهالنقطتين، الأولى عبارة عن سؤال، والثانية عبارة عن تنويه !
1- شو المهارات اللي بتتقنها ؟ شو عندك قدرات بتقدر تستثمرها بالعمل الحر ؟ كتابة ؟ تصميم؟ تصوير؟ هندسة؟ خبرات حياتية معينة؟ حل واجبات؟ برمجة مواقع؟ عمل تطبيقات أندرويد؟ كتابة سيرة ذاتية احترافية؟ فوتوشوب؟ صوتك إذاعي مرتب؟ بتكتب قصص؟
2- إذا ما بتتقن شيء وحابب تتعلم مهارة جديدة بتقدر تبلش فيها، فهل عندك الوقت الكافي لتتعلم وتشوف محاضرات وتقرأ كتب هامة في (مجال معين) ؟ يعني أولاً وأخيراً وزي ما بنقول دايماً إنه (إنت مش أخطبوط) .. فبزبطش تضيع حالك وتقرأ وتدرس مليون مجال وبالآخر تقعد صافن مش عارف كيف ومتى ووين تبلش ! لأ .. ركز ع مجال معين بتلاقي حالك فيه، ووفر وقت منيح عشان تبدأ بشكل سليم عشان ما تفشل .. مجال العمل الحر عبر الإنترنت مجال واسع جداً ومتفرع زيه زي غيره من المجالات على أرض الواقع .. هالمجال بده جهد ووقت وبده (تتخصص) بشغلة .. مش تكون ماشي بالأمور (سبهللة) وشو ما طلع قدامك تجرب !
طيب ، بعد هيك بنيجي للزتونة ، للخلاصة ، للزبدة اللي إنت مستني تشوفها هون :
ححكيلك هلأ ، سريعاً عن بعض مجالات العمل الحر ومواقعه ، اسم الموقع والرابط ، وتعريف بسيط فيه
::: مواقع الخدمات المصغرة :::
www.khamsat.comموقع عربي ممتاز لبيع و شراء الخدمات المصغرة، تجد فيه خدمات كثيرة جداً تبدأ من خمسة دولارات فقط، بإمكانك بيع مواهبك أو قدراتك أو خدماتك فيه ولكننا ننصح بالعمل عليه كوسيط أو سمسار، أي شراء الخدمات من الموقع ومن ثم بيعها بسعر مختلف على أرض الواقع .
www.fiverr.comهو الموقع الأصلي الذي تمّ عمل موقع (خمسات) تقليداً له .. الموقع هائل وشامل جداً وفيه أكثر من ثلاثة ملايين خدمة وهناك باعة حققوا مئات الآلاف منه ، لا تفكر أن تدخله بدون أن تكون لغتك الإنجليزية ممتازة .
::::::::::::::::::::::::::::::::::::
::: مواقع التجارة الإلكترونية :::
الأسواق الصينية
(لبيع وشراء المنتجات الرقمية من كتب إلكترونية أو برامج أو فيديوهات أو ملفات صوتية) المواقع الصينية العظيمة التي تستطيع أن تشتري منها المنتجات بأسعار رخيصة جداً وإعادة بيعها مرة أخرى في الأردن بأسعار أغلى لتحقق أرباحاً عالية.. هذه المواقع تحتوي على عروض بين بين حين وآخر ويوجد بها ميزة استرجاع الأموال في حال عدم تطابق المنتجات للوصف ..
مواقع أخرى غير صينية
ملحوظة (1):
عند التعامل مع هذه المواقع يجب معرفة بريد المنطقة المراد شحن السلع لها أو ما يسمى بـ Jordan zip codes
بإمكانك إيجادها بكل سهولة في جوجل ..
ملحوظة (2): أي شيء من الممكن أن تتم (جمركتك) عليه لأن موضوع الجمارك أولاً وأخيراً عائد لمزاج المخمن .. ممكن أن تطلب ساعات أو هواتف محمولة أو حتى ملابس أو ألعاب وتتم جمركتك .. عادي .. ولذلك إما أن تطلب على العقبة لتدخل أغراضك بدون جمارك ومن ثم تحضرها أنت إلى عمان بمعرفتك وإما أن توصي مخلصاً جمركياً ، أو تطلب عن طريق الموقع الوسيط (كاش باشا) ، وإياك أن تطلب ممنوعات (عطور – أسلحة – أدوية) وما شابه ذلك !
::::::::::::::::::::::::::::::::::::
::: بعض منصات العمل الحر العربية :::
www.mostaql.comمستقل منصة عربية تصل بين أصحاب المشاريع والمستقلين في العالم العربي ..
www.krwah.comموقع خدمي يقوم على إيجاد بيئة آمنة لكل من الشباب الطموح القادر على تقديم الخدمات عبر الإنترنت وبين أصحاب العمل الذين يبحثون عن أشخاص يقوموا بمهمات مختلفة ..
www.academy.hsoub.comمنصةً للعمل الحر في مجال كتابة وتحرير مقالات ودروس عالية الجودة حول مجالات مُختلفة وبلغة عربية فصيحة.
::::::::::::::::::::::::::::::::::::
::: منصات العمل الحر الأجنبية :::
منصات عمل حر أجنبية تقدم فرصة للعمل في مجالات منوعة كالكتابة الاحترافية والتصميم والتسويق والبرمجة وغيرها الكثير من المجالات.
Shopify.comمنصة خاصة لتطلق منها متجرك الإلكتروني وتربطه بصفحتك في فيسبوك.
::::::::::::::::::::::::::::::::::::
::: منشورات مهمة على جروب أونلاينرز :::
::::::::::::::::::::::::::::::::::::
::: مبادئ أونلاينرز اللي لازم إنّك تعرفها :::
1. بنتناول الموضوعات المختلفة في المجموعة بالتدريج وبشكل مختصر .. مهم جداً إنك تطبق، مهم جداً إنك تبحبش، مهم جداً إنك تحضر ورشاتنا ومحاضراتنا، مهم جداً إنك تبحث بشكل جاد أول بأول ، بما يناسب ميولك واهتماماتك ..
2- فش إشي اسمه (الربح من الإنترنت) على فكرة smile emoticon مش عم نحكي عن يانصيب وعن مسابقات وجوائز إحنا .. بنحكي عن شغل حقيقي .. شكل كامل بده جهد ووقت والتزام .. بنكرر النقطة عشان تكون واضحة ومفهومة ..
3- قاعدة أونلاينرز الشهيرة احفظها منيح : (إنت مش أخطبوط) ! لا تشتت حالك عشان ما تفوت ب 200 حيط ! اختار اللي بناسب ميولك ومهاراتك وإلحق شغفك عشان تشق طريقك بنفسك بوضوح وسلاسة وبدون عوائق ومطبّات smile emoticon
4. طوّر مهاراتك باستمرار .. السوق هون حجمه مضاعف كثير والمنافسة فيه دائماً هائلة والبقاء للأفضل والأقوى والأجود والأمهر .. اقبل التحدّي وخلي عندك صبر وإرادة وانضباط وطموح .. كل ما اكتسبت مهارات جديدة كل ما انفتحت إلك ابواب جديدة ..
5- كون من الناس اللي بحبوا الفلوس ، مش من الناس اللي بحتاجوا الفلوس smile emoticon لما تكون بتحب الفلوس رح تبدع أكثر ، وتهلك حالك أكثر ، وتنجز أكثر ، عشان توصل للي بدك اياه بكل قوتك وطاقتك وتركيزك ..
6- حُط خطة منطقية صحيحة لطريقك وحالك من البداية .. ما تتوقع إنك من أول أسبوع أو أول شهر رح تمطر الدنيا عليك مصاري smile emoticon لأ نهائي .. ولا إنك حتروح عالبيت بعد محاضرة لأونلاينرز وتلاقي في فلوس بتستناك تلمها .. المسألة مسألة وقت وتدريب وتطبيق والتزام وجهد وتفكير .. وفي إشي مهم جداً : بس بدك تشتغل افصل عن فيسبوك وواتساب وإنستجرام وسنابشات ! ملحق يا عزيزي .. ملحق .. بعدين بتشوف شو منزلين العالم .. هاد الحكي بطعميش خبز .. خلي عينيك مبحلقات عالأشياء اللي بتطعمي خبز ونوتيلا وتشيز كيك كمان smile emoticon
7- سيبك من جميع اللي بحاولوا يضحكوا عليك سيبك من اللي بدهم يستغلوا طيبتك وحاجتك بإنهم يروجوا لقصص التسويق الهرمي والشبكي والبورصة والفوريكس وغيره .. هاد حكي فاضي وحرام دينياً ، وإحنا قد ما نقدر بنحاول نتحرى الحلال برزقتنا ..
تمنياتنا للجميع بالنجاح والإبهار ، ودعواتكم لنا دائماً smile emoticon
كل الشكر لدانية سمحان من فريق متطوّعي (أونلاينرز) ، واللي ساعدت بشكل كبير جداً بإعداد هذا الدليل smile emoticon ولغسان كردش اللي ساعد بموضوع البايبال ، ولجميع الآراء والاقتراحات smile emoticon
